सिन्धुलीमा भालुले आक्रमण गर्दा बृद्धको मृत्यु

सिन्धुली । सिन्धुलीमा जंगली भालुले आक्रमण गर्दा एक जना बृद्धको मृत्यु भएको छ । जिल्लाको मरिण गाउँपालिका १ कात्तिकेका ७२ वर्षिय गोपिलाल घिसिङको भालुको आक्रमणबाट मृत्यु भएको हो ।
जिल्ला प्रहरी कार्यालय सिन्धुलीका प्रमुख (एसपी) गोविन्दराज काफ्लेका अनुसार छिमेकिको बाख्रा जंगलमा हराएपछि खोज्न जानेक्रममा घिसिङलाई मरिण गाउँपालिका १ कात्तिके स्थित सिम्ले खोल्सीमा भालुले आक्रमण गरेको थियो ।
घिसिङसहित ७÷८ जनाको समुह हराएको बाख्रा खोज्न जंगल पस्दा घिसिङलाई भालुले आक्रमण उनको घटना स्थलमै मृत्यु भएको हो ।
घरदेखि अन्दाजी एक किलोमिटर उत्तर तर्फ रहेको सिम्ले खोल्सीमा भालुले एक्कासी आक्रमण गर्दा घिसिङको गर्धनको हड्डि र हातको नाडि भाचिएको थियो ।
उनको शवको पोष्टमार्टम कपिलाकोट स्वास्थ्यचौकी मरिणमा गरिएको छ । उता मान्छे मार्ने भालुलाई नियन्त्रणमा लिने प्रयास गरिएको भएपनि सफल नभएको गाउँपालिकाका अध्यक्ष विमर्श मोक्तान (प्रख्यात)ले बताए ।
अध्यक्ष मोक्तानले वन जंगलमा हिडडुल गर्दा सावधानी अपनाउन समेत स्थानीयले अनुरोध गरेका छन् ।