स्थानीय तह वित्तीय सुशासन जोखिम मुल्यांकनमा घ्याङ्लेख गाउँपालिका प्रथम

सिन्धुली । स्थानीय तह वित्तीय सुशासन जोखिम मुल्यांकनको सुचकहरुमा सिन्धुलीको घ्याङलेख गाउँपालिका प्रथम भएको छ ।
सिन्धुली जिल्लाका दुई नगरपालिका सहित नौं वटा पालिकाहरु मध्ये घ्याङलेख गाउँपालिका प्रथम भएको हो ।
उक्त पालिका बागमती प्रदेशका सबै स्थानीय तहहरुको मुल्यांकनमा तेस्रो भएको छ ।
नेपाल सरकार, संघिय मामिला तथा सामान्य प्रशासन मन्त्रालयबाट सार्वजनिक भएको स्थानीय तह वित्तीय सुशासन जोखिम मुल्यांकनको सुचकहरुमा ९६ दशमलव ५ प्रतिसत अंक प्राप्त गर्दै घ्याङलेख गाउँपालिका जिल्लामा प्रथम भएको गाउँपालिकाका प्रमुख प्रशासकीय अधिकृत दाताराम प्याकुरेलले जानकारी दिए ।
यो अंक जिल्लाको अन्य पालिकाको तुलनामा सर्वात्कृष्ट हो ।
‘स्थानीय तहले गरेका कार्यहरु तोकिएको समय सिमा भित्र आवश्यक कागजातहरु अपलोड गरि सम्बन्धति जिल्ला समन्वय समितिबाट अन्तिम नतिजा तयार पश्चात गाउँपालिका जिल्लामा प्रथम र प्रदेशमा तेस्रो बन्न सफल भएको हो,’ उनले भने ।
गाउँपालिकामा कार्यरत कर्मचारीहरु, निर्वाचित जनप्रतिनीधिहरुको मेहनत र राज्यप्रति उत्तरदायी भएरकाम गर्दा गाउँपालिकालाई यो स्थानसम्म ल्याई पु¥याउनमा सफल भएको उनको भनाई छ ।
आगामी दिनमा पालिकालाई वित्तिय सुशासन जोखिम मुल्यांकनको सूचकहरुमा देशमै प्रथम स्थना हासिल गर्ने गरी काम गर्ने प्याकुरेलको भनाई छ ।
उनले भने, ‘अहिलेको मुल्यांकनले हामीलाई हौसला प्रदान गरेको छ । यसले थप जिम्मेवार पनि बनाएको छ । हामी यस नतिजालाई कायम राख्दै देशैभरका स्थानीय पालिकामध्य उत्कृष्ट पालिकाको रुपमा छनौंट हुनेगरी काम गर्ने छौं । यसका लागि आफु मात्र नभएर सम्पूण कर्मचारी, निर्वाचित जनप्रतिनिधिको साथ र सहयोग आवश्यक पर्दछ ।’
घ्याङलेख गाउँपालिका सिन्धुलीका नौं वटा पालिका मध्ये दुर्गम पालिकाका रुपमा लिइन्छ ।
यसैविच स्थानीय तह वित्तीय सुशासन जोखिम मुल्यांकनको सुचकहरुमा जिल्लाको सुनकोसी गाउँपालिका दोस्रो भएको छ । उक्त पालिकाले ९४ अंक प्राप्त गरेको छ ।
यस्तै हरिहरपुरगढी गाउँपालिका तेस्रो भएको छ । उक्त पालिकाले ९२ अंक प्राप्त गरेको छ । दुधौली नगरपालिकाले ९१, मरिण गाउँपालिकाले ९० दशमलव ५ अकं, फिक्कल गाउँपालिकाले ८९ दशमलव ५, कमलामाई नगरपालिकाले ८८ दशमलव ५, तिनपाटन गाउँपालिको ८६ दशमलव ५ पाएको छ भने गोलन्जोर गाउँपालिकाले ७१ दशमलव ५ अंक प्राप्त गरेको छ ।