सिन्धुलीका बाढी पिडितलाई बल्ल अनुदान

सिन्धुली । गत असोज ११ र १२ गते रोशी र सुनकोसी नदीमा आएको बढी र पहिरोबाट क्षति भएका निजी आवास पुनर्निर्माणका लागि पिडितहरुले बल्ल पहिलो किस्ता अनुदान पाएका छन् ।
जिल्लाका बाढी र पहिरोबाट संकटग्रस्त चारवटा गाउँपालिकाका ४ सय ६६ जना लाभग्राहीले निजी आवास पुनर्निर्माणका लागि १ करोड १६ लाख ५० हजार रुपैयाँ पहिलो किस्ता बापतको अनुदान पाएका छन् ।
उनिहरुलाई जिल्ला विपद् व्यवस्थापन समितिको निर्णय अनुसार पहिलो किस्ता बापतको १ करोड १६ लाख ५० हजार रुपैयाँ अनुदान रकम निकासा गरिएको सिन्धुलीका प्रमुख जिल्ला अधिकारी लिला प्रसाद शर्माले जानकारी दिए ।
सिन्धुलीको सुनकोसी गाउँपालिका, गोलन्जोर गाउँपालिका, फिक्कल गाउँपालिका र हरिहरपुरगढी गाउँपालिका गत असोज ११ र १२ गते आएको बाढीका कारण सबै भन्दाबढी क्षेती भएका पालिकाहरु हुन् । रोसी र सनेकासी नदीमा आएको बाढीले सुनकोसी गाउँपालिकामा ३ सय ६७, गोलन्जोर गाउँपालिकामा ८३ र फिक्कल गाउँपालिकामा ९ घरमा क्षेती पु¥याएको थियो ।
यस्तै बागमती नदीमा आएको बाढीले हरिहरपुरगढी गाउँपालिकाका ७ घर पूर्ण रुपमा क्षेती भएका थिए । ‘उनिहरुको नीजी आवास पुनर्निर्माणका लागि पहिलो किस्ता बापत जनही २५ हजार रुपैयाँका दरले रकम निकासा गरिएको छ,’ जिल्ला विपद् व्यवस्थापन समितिका अध्यक्ष समेत रहेका प्रजिअ शर्माले भने ।
उनका अनुसार सुनकोसी गाउँपालिकामा ९१ लाख ७५ हजार रुपैयाँ, गोलन्जोर गाउँपालिकामा २० लाख ७५ हजार रुपैयाँ, फिक्कल गाउँपालिकामा २ लाख २५ हजार रुपैयाँ र हरिहरपुरगढी गाउँपालिकामा १ लाख ७५ हजार रुपैयाँ निकासा गरिएको हो ।
रोशी र सुनकोसी नदीमा आएको बाढीका कारण सुनकोसी गाउँपालिकाको आँपघारी, नेपालथोक, कुशेश्वर मन्दिर, मुलकोट लगायतका क्षेत्रमा धेरै क्षेती भएको थियो ।