सिन्धुली । सिन्धुलीको गोलन्जोर गाउँपालिका ३ ग्वाल्टारमा आयोजित निशुल्क स्वास्थ्य शिविरमा ६०१ जनाले विशेषज्ञ सेवा लिएका छन् ।
गोलन्जोर गाउँपालिकाको आयोजनामा तथा मदन भण्डारी स्वास्थ्य विज्ञान प्रतिष्ठान हेटौंडा र समुदाय पद्धति विकास सिन्धुलीको सहकार्यमा गोलन्जोर आधारभूत अस्पताल ग्वालटारमा सञ्चालित दुई दिने निःशुल्क बृहत स्वास्थ्य शिविरमा ६ सय १ जनाले विशेषज्ञ सेवा लिएका हुन् ।
मंगलबारबाट सुरु भएको दुई दिने निशुल्क स्वास्थ्य शिविरमा विशेषज्ञ स्त्री तथा प्रसूती रोग सेवा, भिडियो एक्सरे सेवा, छाला तथा यौन रोग सम्बन्धी उपचार सेवा, हाडजोर्नी तथा नासा रोग सम्बन्धी सेवा, रेडियोलोजी (एक्सरे) तथा जनरल सेवा लिएको गोलन्जोर गाउँपालिकाका उपाध्यक्ष ज्वाला प्रसाद न्यौपाने (पुकार) ले जानकारी दिए ।
उपाध्यक्ष न्यौपानेका अनुसार १ सय ३० जनाले स्त्री तथा प्रसूती सेवा, १ सय १२ जनाले भिडियो एक्सरे सेवा, ४६ जनाले छालासम्बन्धी उपचार सेवा, १ सय ५७ जनाले हाडजोर्नी सेवा, १ सय ९० जनाले एक्सरे सेवा र २ सय १५ जनाले जनरल सेवा लिएका छन् ।
‘यस्तै शिविरमा सुगर, प्रेसर, थाइराइड जाँच तथा परामर्श सेवा, रगत, दिसा, पिसाव, र खकार परिक्षण तथा निशुल्क औषधी वितरण गरिएको छ,’ उनले भने ।
शिविरमा मदन भण्डारी स्वास्थ्य विज्ञान प्रतिष्ठान हेटौंडाका संयोजक चिरन्जीवी चुडाल, डाक्टर सुपेन्द्र कार्की, डाक्टर प्रकाश दाहाल, डाक्टर संजित साह, डाक्टर सुभेक्षा अमात्य, डाक्टर सुनैना यादव, डाक्टर अभिनास यादव, डाक्टर विनय साह लगायतका मदन भण्डारी स्वास्थ्य विज्ञान प्रतिष्ठानका १० जना सहित १४ जना विशेषज्ञहरुले सेवा प्रदान गरेका हुन् ।
शिविरमा सेवा प्रदान गर्ने चिकित्सक तथा कर्मचारीहरुलाई गाउँपालिकाले प्रसंसा पत्र समेत प्रदान गरेको छ ।
शिविर अत्यन्तै प्रभावकारी भएको र शिविरमा गोलन्जोर गाउँपालिका सहित छिमेकी जिल्ला रामेछापका नागरीकले समेत सेवा लिएको गोलन्जोर गाउँपालिकाका स्वास्थ्य शाखा प्रमुख मिन आछामीले जानकारी दिए ।
