सिन्धुली । सिन्धुलीको गोलन्जोर गाउँपालिकाले आयोजना गरेको एकिकृत घुम्ती शिविरको दोस्रो दिन २ सय ३१ लाभग्राहीलाई ४ सय ८३ सेवा प्रवाह गरिएको छ ।
शिविरको दोस्रो दिन गोलन्जोर गाउँपालिका २ वितिजोर बगैँचा वडा कार्यालयमा आयोजित शिविरमा १ सय ३० जनालाई सामाजिक सुरक्षा भत्ता वितरण, स्वास्थ्य सेवा ९१ जनालाई, ८५ वटा कुकुरको स्वास्थ्य परिक्षण तथा रेविज भ्याक्सिन लगाइएको गोलन्जोर गाउँपालिकाका प्रमुख प्रशासकीय अधिकृत चन्द्रकान्त चौधरीले जानकारी दिनु भयो ।
गाउँपालिकाका उपाध्यक्ष ज्वाला प्रसाद न्यौपानेको अध्यक्षतामा आयोजित शिविरमा जेष्ठ नागरीकलाई सामाजिक सुरक्षा भत्ता वितरण गरेर सुरुवात गरिएको थियो ।
शिविरको पहिलो दिन गोलन्जोर गाउँपालिका १ डुडभन्ज्याङमा २ सय ६१ जना स्थानीयले सेवा लिएका थिए ।
यस्तै शिविरमा वडा नम्बर २ को कार्यालयले चालु आर्थिक वर्ष २०८१÷०८२ मा संचालन गर्दै आएको सेवा प्रबाहका विषयमा वडा स्तरीय सार्वजनिक सुनुवाई कार्यक्रमको समेत आयोजना गरिएको छ ।
दुई नम्बरका वडा अध्यक्ष दौलत कार्कीको अध्यक्षता तथा गाउँपालिकाका उपाध्यक्ष न्यौपानेको प्रमुख आतिथ्यता तथा प्रमुख प्रशासकीय अधिकृत चौधरीको विशिष्ठ आतिथ्यतामा आयोजित सार्वजनिक सुनुवाई कार्यक्रममा स्थानीय राजनीतिक दलका प्रतिनिधि, विभिन्न सामाजिक संघसंस्थाका प्रतिनिधि सहित, ९१ जनाको सहभागिता रहेको थियो ।
कार्यक्रममा वडाका कार्यसम्पादन बारे वडा सचिव भवानी ढुंगेलले प्रगती विवरण सार्वजनिक गर्नु भएको उक्त कार्यक्रममा दुई जनाको गुनासो रहेकोमा उपाध्यक्ष, प्रमुख प्रशासकीय अधिकृत तथा वडा अध्यक्षले गुनासोको सम्बोधन गर्नु भएको थियो ।
कार्यक्रममा बडापत्र मिडिया ग्रुपले सहजिकरण गर्दै आएको छ । गोलन्जोर गाउँपालिकाको स्विकृत वार्षिक कार्यक्रम अनुसार गोलन्जोर गाउँपालिका १ देखी ७ सम्मकै वडाहरुमा एकिकृत घुम्ती शिविर र सर्वाजनिक सुनुवाई कार्यक्रमको आयोजना गर्दै छ ।
शिविरको तेस्रो दिन शुक्रबार गोलन्जोर गाउँपालिका ३ को ओख्ले सामुदायिक भवनमा बिहान १० बजेबाट शिविर संचालन हुने बताइएको छ ।
यस अघि बैशाख १४ गते गोलन्जोर गाउँपालिका ५ रतनचुरामा हुने भनिएको शिविर भने स्थागित गर्दै यही बैशाख १७ गते गर्ने कार्यक्रम तय भएको पनि गाउँपालिकाले जनाएको छ ।
