सुनकोसी गाउँपालिकामा गरिएको तालाबन्दी खुल्यो

सिन्धुली  । विद्यालयका प्रधानाध्यापकलाई स्पष्टीकरण सोधिएको विषयलाई लिएर १० दिनदेखि सिन्धुलीको सुनकोसी गाउँपालिकामा गरिएको तालाबन्दी खोलिएको छ ।
मंगलबार गाउँपालिकाका अध्यक्ष दिपा बोहोरा दाहालको अध्यक्षता तथा प्रमुख जिल्ला अधिकारी दिनेश सागर भुसालको समन्वयमा बसेको सर्वपक्षिय बैठकबाट गाउँपालिकाका प्रमुख प्रशासकीय अधिकृत र शिक्षा शाखामा लगाइएको ताला खोलिएको हो ।
सुनकोसी गाउँपालिका ३ मा रहेको प्रगतिशील नमुना माविका प्रअ सरिता चौलागाईंलाई अनियमितता र भुक्तानीको विषयलाई लिएर स्पष्टीकरण सोधेको भन्दै दश दिन अघि सुनकोसी गाउँपालिकामा उपाध्यक्षसहित चार वडाध्यक्षले प्रमुख प्रशासकीय अधिकृत र शिक्षाशाखामा तालाबन्दी गरेका थिए ।
उक्त विषयमा आवश्यक छानविन गरी गाउँपालिकाका प्रमुख प्रशासकीय अधिकृतले प्रतिवेदन तयार गरी नियमनकारी निकायमा यथाशिग्र पेश गर्ने गरी सहमति भएको छ ।
उक्त विद्यालयका प्रअ चौलागाई माथी विद्यालय भवन निर्माण गर्दा भुक्तानी गरिएको रकम हिनामिना गरेको र नियम विपरित सुविधा लिएको भन्दै अख्तियार दुरुपयोग अनुसन्धान आयोगको कार्यालय बर्दिबासमा मुद्धा दर्ता भएको थियो ।
सोही विषयलाई लिएर गाउँपालिकामा समेत तिनवटा उजुरी परेपछि प्रअ चौलागाँई माथी के कसो भएको हो भन्दै गाउँपालिकाको शिक्षा सम्बन्धी कार्यविधि २०७५ को (पहिलो संसोधन २०८०) अनुसार स्पष्टीकरण सोधेको थियो ।
सोही विषयलाई लिएर गाउँपालिकाका उपाध्यक्ष कपिल कुमार कोइराला सहितले लगाएको तालाबन्दी खोल्ने र आवश्यक छानविन गरी सत्यतथ्य सार्वजनिक गर्ने सहमति भएको गाउँपालिकाका अध्यक्ष दिपा बोहोरा दाहालले जानकारी दिए ।
तालाबन्दी खुलेसंगै गाउँपालिकाको सेवा प्रबाह नियमित रुपमा सूचारु भएको छ ।